Bedo aradu

Kacou Philippe ubenyolere ku dwi mir apar’aryo mi oro 1972 i Katadji kud i theng pacu mi Sikensi (Côte d’Ivoire). Etie wod jarafur moko m’usomo ngo. Yor ing’ey dhrasa mapiny, Kacou Philippe ubesomo pare ndhu dhrasa mi lyse. Niay i oro 1992 nitundo i oro 2002, ebekadhu sawa pare ma lee ne calu boy-fundi iwi kabedo mi gyedo.

Dagutielo makwong’a i lem-kristu

Gin ceke ubecaku ku gin mawok iwang’ moko m’etie ko i nindo 24 mi dwi mir ang’wen oro 1993. Mikwong’o, tie yor ibang’ japadhri moko mi katholi re m’ebecidho pi ninyang’ ko i thelembe mi gin mawok iwang’ ne. Macen, ebecidho ibang’ babaptiste ma kugi ebetimo dwi adek macen ebenwang’u yawini ma pa William Branham, ma jarweylembanyong’a moko ma jaamerika. Tie ku yawini maeno re m’ebebedo calu jayic moko ma sai niay i oro 1993 nitundo i oro 2002.

Acaki pa timotim

Kacou Philippe ubecaku ponji pare ma kamaleng’ ku dwi mir abiro mi oro 2002, yor ing’ey lyew ma mir arionde ne ma pa malaika m’etie ko i oro 1993. Ebeyero nia etie jabila ma jakwenda mi kok mi diewor, calku Matayo 25:6.

Pi Kacou Philippe, bakanisa no ceke gibetimo ni jok i nying Yesu-Kristu. Ebetadu pi wang’ mapol gin mawok iwang’ moko mange de m’etie ko i oro 1993 ma kud i iye ebeyero nia egam eneno jutela mi bakanisa no i ayii matung’ : «Kumgi gibedo kum ma pa dhanu ento re wigi gibedo wic pa yedi matung’ tung’ ». Edong’ piemiri ku wec mi kwaya makwong’a gibeyabiri.

Kacou Philippe ubeponjo amung’ madupa, ma calu : « Tek Mungu ugam unyotho racu ceke i pii m’ugam umwonyo ng’om i sawa pa Noa ca, ka nenedi ke ma racu udwog unwang’ere kendo iwi ng’om yor ing’ey pii m’umwonyo ng’om ne ? » Man ponji ne maeno-no jugam julale i zo ne nikum gazeti moko mi Cameroun. Kacou Philippe ubeyero ngbeng’ nia wec pare gitie ku kony marom ku lembe mi jubila mi Biblia.

Paru

Batizo calku Kacou Philippe

Pi Kacou Philippe, Kanisa ubecaku ku Yohana ma Jababutista man ene tie batizo mi lokocwiny. Macen ubebino batizo mi ruc mi dubo ku jukwenda, macen batizo mi gonyo lembe mi wic nikum yioyic ku Martin Luther, macen batizo mi nyoliri kendo pa Kanisa yor ing’ey ragedo mi rumi, macen batizo mi miyo gwok, macen batizo mi lonyiri ku John Wesley, macen batizo mi yubiri kendo ku lem-pentekoste, macen batizo mi nwang’u tego ku William Branham, ka macen batizo mi dwokodwok ma bo ku Kacou Philippe. Man ebecwaku nia woko ku gin maeno ci, batizo mange ceke utie rac, kadok nwang’u gin maeca utimere i nying’ ma pa Yesu-Kristu kunoke i nying’ pa Wego, ku pa Wot ku pa Tipo-Maleng’ nikum bolo jo i pii de.

Kacou Philippe ku lem-kristu

Kacou Philippe ubeneno Biblia calu maraya mi neno ng’ey jo ma pa muthukari moko kunoke buku moko mir usii. Pire en, Biblia utie acoka jamtic ma yor iwang’ usii mi jukristu ku mi yahudi man copo ungo ku kite moko ci nimiyo Kwo ma rondo. Ebewang’u kit Biblia ne mange ceke m’ebenwang’u nia utie ni peko pi yioyic ku macal pa Tob, King James, Tompson, Scofield man Louis Segond. Kacou Philippe ubemiyo kendo koro thelembe mi gin ma tie Lembe pa Mungu, m’ebemiyo ko tung’ tung’ ikind Lembe pa Mungu (lembe ma the gi bed ugonyiri) man theolojia (ng’eyong’ec ma jubed junwang’u gi nikum yore mi ryeko). Edwog ebemiyo kendo koro thelembe mi rucwic ma pa Yesu-Kristu, tuco dubo m’ucikre nibedo kaka maleng’, kabedo pa dhaku kud i Kanisa, batizo mi pii, Tipo-Maleng’, jabila, Biblia, rombo m’ikind Kanisa ku Gafmenti man kitnen madupa mi lem-kristu. Nilubre ku gin maeca, ebekwero ninyuthre i lwong’o moko ma pa ot tic mi Ng’wiyo yamu Ma pi lwak mi Côte d’Ivoire. Edwog ebemiyo kendo koro thelembe pa lem-kristu zo kud i jamtic moko ma julwong’o Buku pa jabila Kacou Philippe, m’ugam uwok ma jupoko iye ni adek i Ot nyayu Buku mi France… Wunen i gazeti : Le Jour Plus N°3399 mi nindo 15 mi dwi mir ang’wen mi oro 2016.

Ku dwi mir adek mi oro 2008, Kacou Philippe ubecoko dhu dilo mi kusoma ceke macen ke juyaw-lembe mi radio ku juwi jubedo ma pacu de i cokiri moko iwi lem-kristu.Ene tie pido mi bakanisa. Gazeti moko ubelwong’e ni maestro mi Lembe pa Mungu. Tie yor ing’ey cokiri maeno re ma ubewok lundo i lembang’eya ne moko mange nia : Jabila moko ubewanyu kendi kud ikum dhanu pa Mungu. Calu William Branham, Kacou Philippe ubetadu pi bedonuti moko ma sagu wi giracwiya m’ebeketho ni ma pa Malaika mi nindo 24 mi dwi mir ang’wen mi oro 1993.

I oro 2008, ponji pa Kacou Philippe jugam jucaku niloko gi ku dhok mange gi de. Lembang’eya gibelalu i ceke ne gi ponji pare ; cil woko ku Côte d’Ivoire de. Lembang’eya moko mi Cameroun ubewodho i badwal mi lembang’eya : Kacou Philippe, jabila moko m’ubino nimiyo alokaloka i lem-kristu. Iwi radio ma calu Afrika n° 1, wec mi piemiri gibeyabiri. Dhanu ne moko gibedwoko wang’ lembe ne i aponda, makunke ju ne moko mange gibetime ngbeng’ i kite mi gero. Ju ne moko mange gibecidho bor nisagu, ku nicoko ko girakiewa pa Kacou Philippe ne acel’acel pi ninyothe ko cu niloyo zo.

I nindo 13 mi dwi mir abic mi oro 2016, jubigam twiyo jabila Kacou Philippe kud i pacu pare nikum judong ng’om mi Côte d’Ivoire pi thelembe mi bolo kwaya i dhu dito ma pa Gafmenti, cwayu jo i adegi mi kusoma man ciko ng’ut jo mi kusoma. Ebitimo nindo abic ku diewor de abic m’ebedo abeda iwi kom moko mi ot tic mi ng’wiyo yamu ma pa lwak mi Côte d’Ivoire. Macen, ebitimo nindo aryo ku diewor de aryo i the ng’om mi ot tic mi judongo mi wi polisi mir Abidjan man dwi adek i ot kol madit mir Abidjan iwang’e m’edwog enwang’ bedo agonya i diewor mi nindo 16 mi dwi mir abora mi oro 2016 ku juke ku twero pare ma pa anyoli mi ng’om, m’andha ne nijuke ku niponjo Lembanyong’a pi oro abic. Dilo mi radio mi Togo man mi Cameroun gigam gilwong’o pido maeca ne ni piny moko m’urem ku der. Ing’eye bor, jutela mi kusoma mi Côte d’Ivoire gibing’eyo nia karaman gigam gibedo i kathere mi twic ku tere ma jutere ko i kol ne.